الاثنين، 18 أبريل 2011

شملول بقى شاعر

شملول بقى شاعر

وبيكتب شعر

بيرص كلامه

بفلوس وبسعر

وفضائياتنا تذيـع

سى ديهات وتبيع

ومطابع كبرى بتنشر

منشار م اللى بينشـر

فى رقاب الناس وعقولهم

م الوهم اللى يبعهولهم

متلحن بالهشتك بشتك

وامان يالا لالي امان

شوطه ومتخلي

شملول وبتوع السيما

وفياجرا العيشة النكديه

ومصيبه لودان مُصغييه

من ولد ولا صبيه

ولا عواجيزنا المتصابيه

******

شملول في شوارع ليلنا

بيحلق على خيبه تجيلنا

يزرعها تقاوى لجيـلنـا

والكل يقولك جيلنا

وبلاوى عمالا تجيلنا

تتنينا وفي الأخر ميلنا

وشعراء الغنوة المضروبة

بيقولك غنوة ومطلوبة

والناس عمالا تصقف

يابلدنا وشعبى المستهدف

بعرايا ورقصة خليعة

بتصيدة حتة تقليعة

ماتقولش يازمن السميعة

طراحة تقاوى الزريعة

النبته من أرض وضيعة

وشملول مش عايز يرحل

ويسيبنا لزمن السميعة

شملول لو تعرف أصلة

صندوق ورنيش في مفاصله

ع الكورنيش م العتبه لشبرا

كشـك جرايد صفرا

على خضرا فى زرقا فى حمرا

بقى شاعر

مش شاعر بينا

لعيب وبيلعب بينا

شملول بيقابل شملوله

واتساعات المدى مقفوله

قال: للغـوله ياغوله

ياست الكل ياحاضره

هافتح صالونين

تصفيف للشعر.

وأخر لحنين

دى مياصه وجعر.

وهاعمل لقائين

ع الغنا والنعر.

وهاكتب كتابين

ع الزنا والمهر.

وعندى رسالتين

للجوع و القهر

وجنابك راح فين

من فوق النهر

وفاضل كتابين

على آخر الشهر

وها ألم القرشين

م الضنا والضنك

وهاضيف حسابين

طوالى في البنك

الوكسه وكسانى

والفالته ف لسانى

والخيبه عجبــاني

ضحكت له الغوله

وقالت:

وأيه كمان؟؟

ياشــملولي

كمــان ؟؟

***

( شملول بقى شاعر

وبيكتب شعر

بيرص كلامه

بفلوس وبسعر )

0 التعليقات:

ISIS © 2008 Por *Templates para Você*