الأحد، 20 نوفمبر 2011

الحياه 2

وبعد الشغل الحلبنتيشي اللي اتكلمنا عليه في البوست اللي فات
اخدنا في الحال ده كتير واخدنا وقت طويل وفيه ناس كتير عرفت 
ازاي مش عارف !!, بس الحيطان ليها ودان والنمله ليها اسنان وانتم عارفين
لغايه اما انا سافرت القاهرة تاني , وطبعاً كنت بتصل بس في الوقت ده كان لسه الموبايل ماطلعش
فكنت بتكلم علي الارضي وطبعاً كلام علي الماشي علشان العيله ماتدراشي ... ياخراشي
واشتغلت في شركة وكنت بدرس في كلية التجارة جامعه حلوان , بس طبعاً كان وقتي كله للشغل ماكنتش بروح الكلية
غير في المناسبات وعمل الكرنيهات , ومره فكرت احضر (كنت فاضي) ودخلت المدرج وقعدت والدكتور دخل وقعد يشرح وبعد كدا بشويه قام طالب وقاله معلش يادكتور انا دخلت غلط , فالدكتور قاله انت تبع ايه فقاله تجاره , فراح الدكتور يهزء فيه لانه مش عارف ان دي محاضره تبع كليه الحقوق , وقعد يقوله انت ايه مش عارف الفرق بين التجاره والحقوق ياتيت ياتيت .... , طبعاً انا كنت زي الولد اللي واقف بياخد فوق دماغه , بس بصراحه هوا كان في مدرج تجاره , يعني مش غلطتي اني مش اعرف ان الحقوق بياخدوا في المدرجات بتاعتنا ( او يمكن كان المدرج بتاع حقوق اوانا مش اخدت بالي ), المهم الولد خدهم علي دماغه وطلعه بره فراح الدكتور قال فيه حد تاني نايم ومش عارف انه في محاضره حقوق , طبعاً انا سكت وكملت المحاضره ومن ساعتها حرمت ادخل المدرج 
المهم خلينا في الرمز أ طبعاً فاكرين , بقت الاتصالات اقل وكدا لغايه ما عرفت انها حتتخطب , طبعاً انا مش قدرت اتكلم لانه انا لسه بدرس وكمان اللي خطبها ده يبقي قريبها , فموضوع الرمز أ كدا خلص , وبعد الزعل والاهات والدموع والعياط حاولت انسي كل اللي فات
فركزت في الشغل وكدا يعني وبقي ياخد كل وقتي تقريباً , وبحكم الشغل عرفت بنات كتير بس للأسف مافيش واحده بقيت معاها كدا يعني فكان المواضيع كلها هزار وكلام عادي واول ما اخرج من الشغل بيبقي كله اتنسي ومش بفكر في واحده فيهم 
وعدت الايام لغايه اما اهلي فضلوا يزنوا علي دماغي , وفعلاً المثل اللي بيقلوا ( الزن علي الودان امر من الريحان ) وخطبت واحده قريبتي وكانت انسانه فوق الوصف بصراحه من الاخلاق والالتزام وكانت مدرسه ابتدائي , وحبتها فعلاً , بس في حاجه محيراني , اما خطبتها كنت معجب بيها بس بعد كدا حبتها او كنت بحبها من قبل كدا , المهم الخطوبه في الاول كانت زي الفل وكنت بقول في نفسي اني الاول مش كنت بحب وهوا ده يبقي الحب , يمكن الله اعلم 
المهم بقي اني في المرحله دي مريت بايام ............................

كفايه كدا وحكمل بعدين



0 التعليقات:

ISIS © 2008 Por *Templates para Você*